
Bless LePoet ft. Azzyl DePoetess
Lutsandvo aluboni lungente ngangaboni kutsi lengikubona kuwe akukho
Akukholwakali kutsi nguwe lo
Nguwe lobotsi simatse nelulwimi
Ngiyacolisa kukutsandza ungangitsandzi
Phela wena awungitsandzi kodvwa utsandza kungenta yakho intsandvo
Intsandvo yakho kuphula yami inhlitiyo ngiyabona
Batsi nabangitjela ngabhonca tindlebe ngiyakutjela
Kumamatseka kwakho kwangenta ngabona likusasa kuwe ngicinisile
Kodvwa lokwente kimi kungivule emehlo lalela
Ngicela ungilalele kwekugcina
Ngiyacolisa kutsandza umuntfu longangitsandzi
Lokubona likusasa emuntfini lote lisasasa ngikucolisela kakhulu
Ngicolisa kukufaka enhlitiyweni yami ube ungafuni
Ngicolisa sibili kukutsandza ngenhlitiyo yami yonkhe
Ngiyacolisa kuphulwa yinhlitiyo ngalendlela yekutikhandza ngisesimeni sekungalucondzi lutsandvo konkhe loku kungenca yakho
Kuya ngekuya kuyenyukela sengicolisela ngalokucabanga ngawe
Linye vo ke licala longangibeka lona ngiyakukhulula
Ngacala kukutsandza mhla ngicala kukubona
Ekukuboneni kwami ngacala ngacabanga ngawe
Kucabanga ngawe kwenta sitfombe sakho sabangumabonakudze emcondvweni wami
Emcondvweni wami kuhlale kudlala sakho sitfombe
Etindlebeni tami kuhlala kumemeta lakho liphimbo
Kwakungasiyo ke inhloso yami kukuphula inhlitiyo, kodvwa ke kwaba kunhlanhlatseka kweyami inhlitiyo, egameni lekuyawufuna madlelo laluhlata
Mine ke ngafikwela kukhohlwa kutsi phela tjani bubaluhlata lapho buniseleka khona
Loko ke kwavesana kwabayikhomba kutsi leligama lelitsi ngiyakutsandza kimi ke selifana nengoma lengiyawuhlezi ngiyihlabelela wonkhe wonkhe
Ingako ke kuyami inhlitiyo wena ke wase sotikhandza ubucalu, kantsi phela ekucaleni lentfo yetfu isacala tsine nawe sasitsembisene kutsi siyawuhlezi sibekana kucala
Kumagama lamanandzi busacasaca ngako ke angikusoli nawungetfwesa licala titsembiso tami lengatenta kuwe ekucaleni sisacala angitifezanga
Lutsandvo lwakho lelali vutsa kuhle kwemalangabi enhlitweni yami lahamba, lahamba lalotsa, ngaba bete ngisho mandla ekuli khwetela
Kungitsandza kwakho akungentanga mine ngaba
nesifiso sekukutsandza ngendlela lefanako
Ngiyacolisa ngiyati ke kutsi ngikulimete kwakungasiyo inhloso yami
Kodvwa ke inhlitiyo ayiphakelwa
Sengenele!
Ngibheme ngakholwa,
Yam' injabulo kadze ngayikhohlwa,
Wena bolinga kukholwa kwami,
Xola nhlitiyo yami,
Uwuphulile umoya wami
Wena bewuligugu kuleyami inhlitiyo,
kodvwa wakhetsa kudlala ngelutsandvo lwethu
Bengitsi ngo khisumusi ngihlanganisa mine,
mine nawe kuze kube nguna Phakade
Ngalelinye lilanga kuyowundlula loku
Yebo ngiyati
Ngeke kwendlule melula kodvwa nje kutondlula
Kusifiso sami kutsi labo lobatsandzako bakutsandze sibili
Kodvwa ke lutsandvo sibili ulutfola kumuntfu sibili
Ngilimele ngalolutsandvo lebengikufunta lona,
ngalo wabuye waluhlanta emehlweni ami
Ngicolisela sikhatsi lengisicitse ngitsandzana nawe
Bengitsi uhlukile ebantfwini balomhlaba kodvwa cha
Kwangatsi kuphula umuntfu inhlitiyo kwacala ngawe
Wena ke wawu ngitsandza futsi ke ngete ngakubeka licala
Ngawe ke ngangicala, kutfola umuntfu longangitsandza,
aze akhone ngisho kungibeka kucala
Angingibeki emacala angitsandze kakhulu futsi kunakucala,
angangibeki emabala, aze angibone ngingulofanele,
kutsi bekangangilandza atongibeka emabaleni akubo
Cha ngiyavuma wena ke wawungitsandza. Ngikhumbula nangicala kukubona,
wavesana wakubeka kwacaca kutsi mine ngingu lokhetsiwe wakhetswa yinhlitiyo yakho,
waze wangetsa ngisho libito lelisha, watsi mine mine ngingu Khetsiwe
Sifundza ke ngema phutsa, ngiphutselwe litfuba lekutsandvwa ngekweli ciniso
Nami ke ngilimele, kutsiwa sala kutjelwa sibona ngemopho
Namhla ngiyopha ngoba ngyati angiyomtfola loyongitsandza njengawe,
noma lamanceba angaphola lonjengawe angiyomutfola.