
Bless LePoet
Labanye bengiphila nabo ngingaphili ngabo ngaphilisi kwabo
Emakhaya kunetintfo letenteka ngisafika emnyakeni leyengca,
lengafuni kuphuma ekhanda ngobe ngahlukubeteka
Ngenhlanhla ngakhula ngikhuliswa ngelutsandvo kute kubenyalo esikhatsini sami sekuhamba em'hlabeni
Bemndeni emndenini nangigula kute bekatihlupha ngekungihlola noma angitsengele ngisho liphilisi nome imitsi
Nginibonile nihlangene ngami kuyi get-together ngobe ngingasekho
Kukubi nibahle ngobe bengisemubi, sengimhlophe ngilele kwengunaphakadze
Bengisemngcwabeni wami!
Ngifundzile kutsi cha kulikhuni kuncoma umuntfu asaphila
Bengati kutsi imisebenti yami bayayibona emhlabeni kantsi batokhuluma ngayo ngasengekho
Ngibone nesitsa sami sikhala, sikhala kwangatsi siva buhlungu ngatsi basihlabe ngesikhali kani sona besikhalela kutsi sesijabulile mine lebengisiphilisa kabuhlungu angisekho eveni, sengingene kulelinye live lasingayophindze siphilisane kabuhlungu
Lokungivise buhlungu kakhulu laba labebakhala kakhulu ngulabo lebekadze bangitondza ngisaphila emhlabeni
Bafakazile ke ngami labanye bafakaza emanga, labanye bafakaza emaciniso labanye bebakadze bangati lutfo kephana bebakadze bakhuluma ngami
Utsite umfundisi "Ngicela lotokhulumela bangani", kwakhuluma sitsa kungivise buhlungu kakhulu loko ngiphose ngavuka ngema ngetinyawo
Ngaze ngakhumbula emavi latsi "Umndeni uwubona ngesikhatsi senhlupheko" ngike ngathandaza kuMdali kutsi amane akhweshise tinyoka emphilweni yami, ngabona kukhwesha lilunga lemndeni
Nginibonile nijabulile labanye bakhala bahhuba litiya ngebumnyama, njengemalahle umkami embets' ingubo lemnyama
Nginivile etindlebeni tami nicula emagugu ngemavi lagcwele tinyembeti nenjabulo
Ngini, ningitsatsa ningihlalisa ngephandle emakhateni ethendeni, angati nami ngonani awu babe wabonani!
Nasho ngemahubo nitsi "Besim'tsandza, sim'khatsalela" nisho ngekungihleka njalo uma ningibona ngoba ngingasafani nani nganam'tali, nganamali etimalini
Khala hleka kuyafana ngobe sekute lengisakuva kuphela nje utabe udlala ngetinyembeti takho
Bengisemngcwabeni wami itolo, bangibhulela ematolo
Nganibona nigadz'libhokisi nilindze ngifakw'endlini yami yekugcina
Nganiva nilivula libhokisi ningilungisa kwekugcina, kwatise phela sophinde ningibone
Ngaweva lamavi nisho nitsi ngilale ngoxolo, ngilale ngiphumule, ngitophumula kanjani ningilahlel'emgodzini kubi kwetibi
Ningigciba tinyawo tenu tigcwele ludzaka, ningicindzetela ngem'hlabatsi sengats' angikaze ngibekhona kulom'hlaba, ningibek' ematje sengats' anifuni nekutsi nginyakate kuleyo ndzawo ningilahle kuyo
Ningishiya ngedwa esigangeni, nicoca niyongen'ethendeni niyofuna lokuyangasethunjini
Namhla nginekiwe la ebaleni, nalengubo yami yekugcina niyitsetse najika nayo
Yinye tibili timbali, angati nome kusicalekiso yini!
Titsa tami nchiphisani lulaka
Bengititjela kutsi ninelutsandvo kantsi cha kubonakele kutsi lutsandvo kuba lutsandvo uma kutsandzana umndeni lone lutsandvo, lowutsandzana ngekweliciniso
Cicici indlu yeligagu iyanetsa!
Ngibuhlungu kubuhlungu kuyavela
Sebangishiye ngedvwa angikhoni nekunyakata
Namhla kulele babili batsatfu ngabe siyavusana
Sengiyowuhlangana nababe namake
Bengisolo nginawe ngiyohlezi nginawe
Sale ngilala ngek'thula ngingu Sibusiso Shongwe
Sengigcina singagcini nakuphela kuphela ekupheleni ngimi um'bhali Bless LePoet